மலருக்கு 16 வயது இருக்கும் போது, அவள் வீட்டிற்கு எதிரே சூர்யா குடும்பம் குடி வந்தது. சூர்யா அப்போது கல்லூரியில் படித்து கொண்டிருந்தான். தினமும் காலையில் மலர் பள்ளிக்கு போகும் போது அவனை பார்ப்பாள். மாலையில் விளையாடும் போதும் பார்ப்பாள். ஆனால் அந்த வயதில் அவளுக்கு அவன் மேல் எந்த காதல் எண்ணமும் வரவில்லை. வெறும் எதிர் வீட்டு அண்ணன் போல தான் தோன்றினான்.
வருடங்கள் வேகமாக ஓடின. மலருக்கு இப்போது 21 வயது. கல்லூரி படிப்பை முடித்து விட்டு வீட்டில் இருக்கிறாள். அவள் ஒரு சாதாரண நடுத்தர குடும்பத்து பெண். அப்பா ஒரு சின்ன கடையில் வேலை பார்க்கிறார். அம்மா வீட்டு வேலை.
21 வயதானதும் பெற்றோர்கள் அவளுக்கு மாப்பிள்ளை பார்க்க ஆரம்பித்தார்கள். முதல் வரன் வந்தது, பையனுக்கு 28 வயது, சொந்தமாக தொழில். மலரிடம் போட்டோ காட்டினார்கள், மலர் ஒன்றும் சொல்லவில்லை. மனதில் எந்த ஈடுபாடும் இல்லை. அந்த வரன் தள்ளிப்போனது. இரண்டாவது, மூன்றாவது என்று அடுத்தடுத்து மூன்று வரன்கள் வந்தன. அதில் ஒரு வரன் பெற்றோர்களுக்கே பிடிக்கவில்லை, ஜாதகம் சரியில்லை என்று சொல்லி நிறுத்திவிட்டார்கள்.
அப்போது தான் மலருக்கு ஒரு பெரிய உண்மை புரிந்தது. தான் ஏன் யாரையும் பிடிக்கவில்லை என்று சொல்கிறோம் என்று. தன் மனதில் 16 வயதில் இருந்து பார்த்த சூர்யா தான் இருக்கிறான் என்று. அவன் சிரிப்பு, அவன் பேசும் அழகு எல்லாம் அவள் மனதில் பதிந்து விட்டது என்று புரிந்தது. இதை அவள் தன் தங்கை தேன்மொழியிடம் மட்டும் ரகசியமாக சொன்னாள். தேன்மொழி "அக்கா, சூர்யா அண்ணா ரொம்ப நல்லவரு, உன் காதல் நிச்சயம் ஜெயிக்கும்" என்று தைரியம் கொடுத்தாள்.
அதன் பிறகு நான்காவது வரன் வந்தது. அந்த பையன் நல்ல பணக்காரன். ஆனால் மலருக்கு அவனை பார்த்தாலே பிடிக்கவில்லை. என்ன செய்வது என்று இரண்டு நாள் யோசித்தாள். கடைசியில் ஒரு தைரியமான முடிவு எடுத்தாள். அந்த மாப்பிள்ளை வீட்டு நம்பரை வாங்கி, அவளே போன் செய்து "எனக்கு இந்த திருமணத்தில் விருப்பம் இல்லை, தயவு செய்து இந்த சம்பந்தத்தை நிறுத்திவிடுங்கள்" என்று தெளிவாக சொல்லிவிட்டாள்.
இந்த விஷயம் பெற்றோர்களுக்கு தெரிந்ததும் வீடே போர்க்களம் ஆனது. அப்பா கத்தினார், "உனக்கு பிடிக்கலனா எங்ககிட்ட சொல்ல வேண்டியது தானே, ஏன் அவங்க வீட்டுக்கு போன் பண்ணி எங்க மானத்தை வாங்கின?" என்று திட்டினார்.
மலர் அப்போது மனதில் மட்டும் நினைத்தாள், "நீங்க தான் என்னை சின்ன வயசுல இருந்து சூர்யாவை பார்க்க வச்சீங்க. நான் அவனை காதலிக்கிறேன் என்று உங்களுக்கு தெரியாது. நீங்க என் சம்மதம் இல்லாம எனக்கு கல்யாணம் பண்ணி வச்சுருவீங்களோனு பயந்து தான் நான் இப்படி பண்ணினேன்" ஆனால் அதை வெளியே சொல்ல பயந்தாள்.
பெற்றோர்களுக்கு அவள் காதல் தெரியாததால், தொடர்ந்து வரன் பார்த்து கொண்டே இருந்தார்கள். மலர் எல்லாவற்றையும் மறுத்து கொண்டே வந்தாள். வீட்டில் தினமும் சண்டை.
அந்த சமயத்தில் தான் மலருக்குள் ஒரு புது லட்சியம் பிறந்தது. வெறும் காதலுக்காக அழுது கொண்டிருந்தால் முடியாது, பெரிய ஆளாக வேண்டும் என்று. அவள் IAS ஆக வேண்டும் என்று முடிவு செய்தாள். அது அவளுக்கு பிடித்த லட்சியமும் கூட.
அன்றிலிருந்து அவள் வாழ்க்கை மாறியது. காலையில் 4 மணிக்கு எழுந்து படிக்க ஆரம்பிப்பாள். பகலில் வீட்டு வேலைகளை செய்து விட்டு, மதியம் ஒரு சின்ன தையல் கடையில் வேலைக்கு போனாள். அங்கு கிடைக்கும் சம்பளத்தில் புத்தகங்கள் வாங்கினாள். இரவு 11 மணி வரை படிப்பாள். காதல் ஒரு பக்கம், லட்சியம் ஒரு பக்கம் என்று இரண்டையும் சமமாக பார்த்து கொண்டாள். அவள் வேலை பார்த்து படித்தது யாருக்கும் தெரியாது.
ஒரு நாள் அவள் காதல் விஷயம் பெற்றோர்களுக்கு தெரிந்து விட்டது. அவள் டைரியை அம்மா பார்த்து விட்டார். உடனே இன்னொரு பணக்கார வரனை கொண்டு வந்து "இவனை கட்டிக்கோ, சூர்யாவை மறந்துவிடு, அவன் பணக்காரன், அவன் ஒரு பணக்கார பெண்ணை தான் கட்டிக்குவான், உன்னை ஏற்றுக்கொள்ள மாட்டான், உனக்கு அவன் கிடைக்கவே மாட்டான்" என்று சொல்லி அவளை மிகவும் அசிங்கப்படுத்தினார்கள். "உன்னை மறந்துவிட்டோம்" என்று கூட சொன்னார்கள்.
ஆனால் மலர் அப்போதும் சூர்யாவை விட்டுக்கொடுக்கவில்லை. "சூர்யா இல்லாம என்னால வாழவே முடியாது" என்று அழுது கொண்டே வைராக்கியமாக படித்தாள். சில நேரம் "நான் மட்டும் பணக்காரியாக இருந்தால் சூர்யா எனக்கு கிடைத்திருப்பானே" என்று தனியாக உட்கார்ந்து அழுவாள்.
அவளின் உண்மையான காதலும், கடின உழைப்பும் வீண் போகவில்லை. இரண்டு வருட கடின உழைப்புக்கு பிறகு அவள் IAS பரீட்சையில் வெற்றி பெற்றாள். அந்த செய்தி கேட்டதும் பெற்றோர்கள் ஆச்சரியப்பட்டார்கள், அழுதார்கள். சூர்யாவும் அவளை தேடி வந்து வாழ்த்தினான்.
கடைசியில் மலரின் நம்பிக்கை ஜெயித்தது. வேலை பார்த்து கொண்டே படித்து ஜெயித்த அவளை பெற்றோர்கள் பெருமையாக பார்த்தார்கள். அவள் லட்சியமும் நிறைவேறியது, அவள் காதலும் வெற்றி பெற்றது. சூர்யாவே வந்து "நான் உன்னை தான் கல்யாணம் பண்ணிக்குவேன்" என்று சொன்னான்.
